Ég sótti hana Maríu mína útá lestarstöð á föstudaginn, og rétt náði að fylgja henni heim áður en ég þurfti að skjótast í grískutíma. Þegar ég kom heim aftur fórum við og versluðum í matinn og tókum á leigu Menn som hater kvinner. Hún var mjög spennandi og við nutum þess að horfa á hana eftir að hafa borðað kjúklingaréttinn sem við löguðum. Á laugardeginum var rigning og leiðindaveður, en við létum það ekki stoppa okkur, heldur fórum í Tusenfryd eins og við höfðum planað. Fyrst var þó Fróða komið fyrir í pössun hjá Miriam. Við áttum blautan og kaldan dag
í Tusenfryd og mér tókst bara að fá Maríu með mér í tvö tæki, en sjálf fór ég þrisvar í trérússibanann. María var ekki alveg með taugar í þetta heldur stóð bara og horfði á. Frá Tusenfryd tókum við strætó til Klöru þar sem við snæddum kvöldverð með henni og fjölskyldunni hennar. Börnin og barnabörnin voru í heimsókn svo við vorum um 14 manns. Á sunnudeginum fórum við í messu hjá Íslenska söfnuðinum og skelltum okkur svo á Jenta som lekte med ilden um kvöldið. Við urðum auðvitað að sjá framhaldið og það olli ekki vonbrigðum. Í dag var síðasti dagurinn okkar saman og við fengum alveg æðislegt veður. 
Camilla kom með okkur á Akerbrygge þar sem við sátum úti á TGI Friday og tróðum í okkur alls kyns kræsingum. Ég fylgdi svo Maríu út á lestarstöð eftir frábæra helgi.
Það eru svo miklu fleiri myndir á myndasíðunni svo endilega kíkið þangað ;)
Nú tekur við verkefnavinna, próflestur, skóli og vinna.