Nú er ég komin heim í litlu sætu íbúðina mína hér í Osló eftir æðislega dvöl heima með fjölskyldunni um jólin. Jólafríið var alveg yndislegt, það var svo gott að fá að vera með fjölskyldu og vinum yfir hátíðarnar. Ég stóðst allar freistingar hvað matarprógrammið varðar og náði eflaust af mér einhverjum kílóum til viðbótar við þau 15 sem ég hef þegar misst. Ég setti inn myndir af þrettándaboði hjá honum Guðbrandi frænda,...
....en fleiri myndir eru á leiðinni :) Ég var töluvert með hana Emmu litlu hjá mér síðustu dagana fyrir heimför og það var rosalega gaman. Emma er nottla bara yndisleg, ofsalega róleg og góð, en um leið ákveðin og hugrökk. Ég hugsa að hún sé perfect match fyrir Fróða og ég get ekki beðið eftir því að Halla vinkona komi til mín í febrúar með hana Emmu litlu í farteskinu :)
Ég setti fleiri myndir af Emmu litlu í albúmið hennar.
Hér er alveg ofboðslegur kuldi enda frostið farið niður fyrir 20 gráður. Ég fór og náði í hann Fróða minn til Camillu í gær og það var svo yndislegt að sjá litlu músina mína aftur, enda knúsaði ég hann hreinlega í klessu. Má samt ekki gleyma að það var æði að hitta Camillu og Torje aftur og við áttum fína kvöldstund saman. Mér tókst einhvernveginn að missa af T bananum og strætónum tvisvar á leðinni heim í gærkvöldi samt og í þokkabót fór ég út einni stoppistöð of seint svo ég þurft i að labba í hálftíma í frostinu með Fróða og búrið og allt hans hafurtask. Ég svaf svo auðvitað yfir mig í morgun, en tókst að koma mér í vinnuna á mettíma og átti ágætan, en samt pínu skrautlegan dag í vinnunni.
Á morgun þarf ég að vinna i sunnudagaskólanum og svo er planið að fara í einhverja góða göngu með Fróða. Hann er reyndar farinn að hoppa á þrem fótum í kuldanum svoleiðis að ég þarf að kaupa loppusokka fyrir hann á mánudaginn, grey kallinn. Hann verður nú ekki ánægður með það!