helgak.net

Við höfum það ágætt hérna á Jutulveien. Að vana hef ég í nógu að snúast með vinnu, skóla og hvolpauppeldi!  Emma hefur tekið framförum undanfarna daga. Hún er byrjuð að höndla það mun betur að vera ein heima og í dag fór hún sjálf inní hvolpagrindina þegar ég var á leiðinni út í dag :) Taumþjálfun og umhverfisþjálfunin krefst mikillar þolinmæði, helling af hundanammi og óteljandi "ossofiiiiiiin." En þetta er allt að koma. Sólin er loks farin að láta sjá sig hér í Osló og síðustu daga hefur hitinn farið yfir frostmarkið um miðdegið. Síðustu helgi fór ég í göngu til Lilleroseter með Camillu, Torje og voffana. Ég tók nokkrar myndir en svo eru fleiri í myndaalbúminu ;)

Norðmenn og skíðin þeirra!

Emma var hörkudugleg að labba, en þáði líka alveg far í jakkanum hennar Camillu þegar það var í boði. 

Ein af okkur litlu fjölskyldunni í lokin :)

Fróði fór í aðgerðina í gær og það gekk bara mjög vel. Hann er með fimm spor á hnakkanum og þarf að vera í hrikalega hallærislegum hvítum samfestingi sem hann er EKKI hrifinn af! Ég fór samt í smá göngu með þau í dag enda æðislegt veður og Fróði var dauðfeginn að fá að fara úr samfestingnum :p

Fróði er því miður búinn að vera duglegri enn Emma að leggja á sig og er orðinn 8.1 kíló :s

Emma fer sjaldnast langt frá stóra bróður

Höfðinginn. Ég held svei mér þá að hann sé að verða rauðhærður einsog afi sinn...

Systkinin

Að vana enda ég bloggið á mynd af Emmu litlu, sem er ennþá bara eitt kíló og 16 vikna...

Vona þið eigið góða viku, sakna ykkar allra hrikalega. 

Í gær fór ég útá flugvöll með hjartað í buxunum að taka á móti Höllu og hvolpunum. Ég hafði miklar áhyggjur af tollinum og hafði legið á bæn allan morguninn. Klukkan korter yfir eitt kemur svo Halla mín inní komusalinn með kerru hlaðna farangri og búrinu með hvolpunum efst. Ég mundi nú að knúsa Höllu áður en ég rak nefið í búrið og þar tók á móti mér blautur koss á nebbann frá henni Emmu minni sem þekkti mig einsog skot. 

Edh litli hjúfraði sig að systur sinni innst í búrinu. Ferðin heim í snjó og roki var löng og gott að komast inn í hlýjuna með hvolpakrílin. Emma kom strax útúr búrinu, meig á pissumottuna og rauk svo undir sófa að skíta. Edh þurfti aðeins lengri tíma til að koma út, en þá varð líka rosa stuð! Fróði þefaði aðeins af þessum hvolpavitleysuingum og fór svo og lagði sig. 

Við Halla vorum líka alveg búnar á því og eftir að hafa farið með Edh til Lindu og Markúsar, sonar hennar, þar sem hans var beðið með mikilli eftirvæntingu. Við fengum okkur í gogginn og fórum svo í háttinn, en Emma svaf alla nóttina í búrinu sínu þegjandi og hljóðalaust (fyrir utan smá tíst þegar ég fór á klósettið).

Dagurinn í dag var líka viðburðarríkur fyrir Emmu litlu, en við skelltum okkur í smá bæjarferð með voffana. Ég fór í dýrabúð og ætlaði að fá beisli fyrir Emmu en allt var of stórt. Í staðinn keypti ég nýjar buxur þar sem allt er orðið of stórt. Við kíktum svo í Bok og Media og þar var Emma að sko í essinu sínu. Hljóp útum í allt, eða eins og taumurinn leyfði og meig svo á gólfið! Fróði fékk þá fyrst áhuga á henni og ætlaði að leika við hann, eins og honum einum er lagið, með því að hoppa á hana. Það fannst Emmu ekki skemmtilegt og hún hikaði ekki við að urra á hann og sýna honum tennurnar (ég efast þó um að hann hafi séð þær því þær eru svo litlar). 

Það eru fleiri myndir á myndasíðunni :)

Í kvöld bauð Arna okkur í mat sem var rosalega kósí. Við fengum að sjá Sigrúnu sem hefur stækkað helling og kjöftuðum svo alltof lengi þannig að við misstum af síðasta strætónum heim og þurftum að taka leigubíl. Það var samt bara ágætis lúxus og við ákváðum bara að njóta þess. Nú erum við komnar aftur í íbúðina, frekar uppgefnar eftir langan dag, allir nema Emma sem þýtur um allt einsog skopparakringla.

Tíminn hefur liðið hægt undanfarna daga og biðin eftir Emmu löng. En hún hefur það gott hjá Önnu Jónu og systkinum sínum heima á Íslandi. Kristín kíkti í heimsókn og tók myndir sem ég rændi og setti á síðuna mína. Halla mín kemur svo með Emmu og Edh bróður hennar til Noregs eftir 12 daga! Mér hefur verið falin sú ábyrgð að finna Edh heimili hér í Noregi, en hann mun að öllum líkindum búa hjá yfirmanninum mínum í töskubúðinni og börnum hennar tveim og Border Collie hundinum Leo.

Edh sæti

Ég fæ reglulega fréttir af Emmu litlu en hún stendur sig rosa vel og er algjör töffari. Það verður æðislegt að fá hana hingað og ég er rosa spennt að sjá hvernig Fróði tekur henni. 

Emma sæta

Í millitíðinni fær hann þó að kynnast Fríðu, nýja hvolpinum hennar Camillu sem hún fékk í dag og er blanda af Risa Púðlu og Flat Coated Retriever. 

Ég er að reyna að komast í skólagírinn, en hef átt frekar erfitt með að rífa mig úr jólagírnum og einbeita mér að bókunum. Lánasjóðurinn gerir mér heldur ekki auðveldara fyrir þar sem ég hef ekki enn fengið námslánin greidd :( Nú í gær var fyrsta bænastund okkar nýstofnaða bænahóps. Meðlimir hans eru ég, Camilla og Miriam. Við áttum rosa fína kvöldstund saman og ætlum að reyna að hittast einu sinni í viku næst á föstudag.

Nú um helgina er ég að vinna í töskubúðinni og svo sunnudagaskólanum áður en ný skólavika hefst. 

Það hefur verið yndislegt að fá að vera heima um jólin. Mér reyndist erfitt að halda mig við matarprógrammið innan um allan hátíðarmatinn, en stóðst þó þá þolraun. Ég fékk margar frábærar gjafir sem ég er þakklát fyrir. Ég hef þurft að þola að vera kölluð "the scrooge" þar sem ég vil ekki sjá jólagúmmelaðið né jólatréð sem ég er með ofnæmi fyrir. Nú höfum við pabbi brennt það á báli, bara til að átta okkur á því að jólarósin gæti verð sökudólgurinn! Áramótin voru fín, þó ég muni ekki eftir öðrum eins reykmökk yfir Reykjavík, við sáum enga flugelda nema þá sem við skutum upp sjálf!

Hin hefðbundna pizza var á boðstólum, en ég utbjó mína eigin míní "pizzu" úr hveitikími.

Að vana eru fleiri myndir í myndasafninu

Ég fékk hana Emmu litlu í heimsókn í gær, sem var bara gaman. Hún er ekkert smá dugleg og opin. Var strax einsog heima hjá sér og lék sér við bangsann hans Fróða og skóflaði í sig blautmatnum.

Ég er ekki frá því að emma verði sætari með hverjum deginum, en það verður spennandi að sjá hvernig hún þroskast. Það er allt í fullum gangi með að sækja um innflutningsleyfi fyrir hana til Noregs og vonandi gengur eftir að ég fái að hafa hana með mér þegar ég flýg heim 8. janúar. Emma hefur hlotið ættbókarnafnið "Stekkur Emma til séra Helgu" svo það er einsgott ég ljúki nú við prestnámið úti :þ

Nú er orðið ansi langt frá sístu færslu og kannski í lagi að koma með smá update. Ég átti rosalega fína helgi í Kristiansand fyrir viku, þegar ég heimsótti Henriette, fyrrum bekkjarsystur mína. Ég fékk aðeins að kynnast vinum hennar á kollektívinu þar sem hún býr og var svo heiðursgestur í afmælisveislunni hennar á laugardeginum. 

Ég fékk ódýra miða í rútuna, en þetta er fimm tíma ferðalag í tveggja hæða rútu með þráðlausu interneti. Ekki sem verst og svo fékk Fróði að fljóta ókeypis með og var hæstánægður í bílbelti í sætinu við hliðina á mér. 

Ég er mjög ánægð að ég skellti mér og ekki veitti af að hlaða batteríin fyrir vinnuvikuna sem nú er loks á enda. Yfirmaðurinn minn í vinnunni var að fara úr límingunum í jólastressi og tók það allt út á mér. Ég var alveg að fara að springa og var gjörsamlega uppgefin þegar ég kom heim úr vinnunni í gær. Nú fæ ég að pústa smá, allavega á morgun áður en ég mæti aftur á þriðjudag. Í dag vann ég í sunnudagaskólanum með Sakaríasi sem var bara ágætt. Ég og Camilla vorum svo búnar að ákveða að hittast niðrí bæ og fara í messu, en henni var boðið í mat svoleiðis að ég var bara heima að þrífa. Á morgun ætla ég svo í einhvern góðan göngutúr með Fróða og planið er að hafa myndavélina með. Camilla verður kannski með í för, en hún er orðin eitthvað lasin svo kannski það verðum bara við Fróði. 

Ég fór til læknis á föstudaginn, vegna útbrota sem ég er með yfir nánast allan efri hluta líkamans. Læknirinn tók blóðprufu og sagði mér að leita snarast til húðsjúkdómalæknis, svo vonandi fæ ég tíma sem fyrst. 

Í dag er einungis vika þangað til ég kem heim og ég hlakka alveg óendanlega mikið til. Vona innilega að næstu dagar verði fljótir að líða!

.....blessuð prófin. Eða prófið. Nú er einungis rúm vika í prófið mitt og ég er búin að vera í töluverðu stressi, enda hellingur sem ég þarf að lesa og ekki bætir vinnan úr skák. Síðasta helgi var þó alveg frábær, það er að segja sunnudagurinn. Mamma átti þá 59 ára afmæli á meðan ég skellti mér á Hundelivsmessen með Camillu og Torje. Ég gleymdi auðvitað myndavélinni, en rændi nokkrum myndum af vélinni hennar Camillu og setti inná síðuna. Ég keypti helling af fóðri gotteríi fyrir Fróða og fékk ókeypis heilsufarsskoðun fyrir kappann. Dýri þreyfaði hann í bak og fyrir og hann hefur nú að fullu náð sér í líðunum. Dýri sagði ennfremur að þetta hefði verið vegna þess að við fórum okkur of geyst í hundafiminni. Nú þarf ég að byggja hann upp smátt og smátt en við ættum að geta farið að æfa aftur innan skamms, sem eru nottla frábærar fréttir. 

Ég ákvað svo að gerast áskrifandi af Vi Med Hund, þar sem það var á einhverju svaka tilboði og fékk í tilefni þess senda þessa forsíðu með mynd af sjálfum kappanum. 

Gæti nottla ekki verið meira sammála niðurstöðu kviðdómsins:p

Ég fór líka loks í gegnum myndirnar frá Íslandsheimsókninni , en albúmið er hérna á síðunni. 

Endilega kíkið á þær :D

Það er kominn töluverður jólablær á síðuna mína, en ég ákvað að það væri þörf á smá jólastemmingu núna í myrkri, rigningu og kulda. Í dag var ég í vinnunni með Fróða kallinn, en þar á hann dyggan aðdáendahóp. Fólk sem vinnur í senterinu og kemur bara til að heilsa uppá prinsinn. Eftir vinnu keypti ég jólaljós í gluggana hjá mér og lítinn dúk til að hafa á borðinu. Svo verður jólahreingerning eftir prófið þar sem verður skreytt rækilega. 

Í desember er dagskráin vel þjöppuð enda verð ég að vinna helling og kíki svo til Kristiansand í heimsókn til Henriette vinkonu. Í næstu viku eru hins vegar þrír skilafrestar sem renna upp og áframhaldandi prófalestur og vinna í fyrramálið. 

Mitt í öllu þessu er ég dugleg í fráhaldinu mínu, en er þakklát fyrir allar bænir, sérstaklega núna í prófkvíðanum.

Dagarnir eftir komuna aftur hingað út hafa verið misgóðir og miserfiðir. Nú hef ég verið í fráhaldinu mínu í 2 vikur!!! Hugsa ég hafi borðað meira af grænmeti á þessum tveim vikum en alla ævina samanlagt. En mér líður vel á sál og líkama og er þakklát fyrir að vera í þessum bata. Að venju hef ég haft í nógu að snúast. Nú er einungis tæpur mánuður eftir af skólanum og því heilmikið af verkefnum sem þarf að klára og prófalestur sem þarf að hefjast. Helgin verður því vonandi nýtt skynsamlega. Ætla líka að prófa mig aðeins í eldamennskunni svo ég fái nú inn einhverja fjölbreytni á matseðilinn. Er með lista af allskyns grænmeti sem ég ætla að kaupa, en ég held það sé vissara að prenta út myndir af því líka. Nú hefði ég sko þurft Kötu, eða Fjólu eða Höllu eða einhverja af mínum yndislegu vinkonum til að hjálpa mér! En stuðningurinn sem ég hef fundið frá fjölskyldu og vinum hefur verið nær áþreyfanlegur síðustu daga og ég er þakklát fyrir bænir ykkar. Fróði virðist hins vegar vera sá eini sem er ekki sáttur við að ég sé að taka aðeins til í matarræðinu. Það eina sem fellur á gólfið eða í tunnuna er eitthvað ógislegt grænmeti. Fuss og fí. Í "skaðabætur" fékk hann þó nýja peysu úr Accessories. 

Hann fer ekki leynt með ánægju sína eins og sést á myndinni. Ég er samt frekar fúl af því að allur fíni snjórinn sem var fallin hérna, hefur nú skolast burt. Ég sem ætlaði að fara i fína vetrargöngu með Fróða á morgun og hafa myndavélina með og alles. Oh well...

Nú ætla ég að glápa kannski á einn þátt í viðbót áður en ég fleygi mér í bælið. Hafið það gott!

Nú eru einungis 5 dagar í að ég komi á klakann og ég get varla beðið!!! Tíminn verður hins vegar fljótur að líða þangað til enda þarf ég að skrifa verkefni, mæta í skóla og vinnu, þvo þvott og já, þetta vanalega.

Í gær hélt ég andakt í skólanum mínum, það gekk vonum framar og ég fékk mjög góð viðbrögð frá kennaranum og nemendunum i hópnum mínum. Það var svo strax í næsta tíma sem ég þurfti að vera með míní fyrirlestur um "tegntrekanten" sem gekk bara mjög vel líka. 

Eftir skóla fór ég svo að ná í nýju gleraugun mín í gleraugnabúðina á horninu á Majorstuen. Ég skellti nýju glyrnunum strax á nefið, en hef kannski ekki gefið mér nógan tíma að venjast þeim því ég flaug á hausinn ca 2 metrum frá gleraugnabúðinni og lenti kylliflöt á götunni. Ég vissi ekki hvaðan á mig stóð veðrið, en hafði í fallinu misst tauminn hans Fróða, hann hætti þó við að stinga af þegar hann sá ég hafði meitt mig. Bilarnir höfðu líka sem betur fer séð okkur og hægt á sér en ég dröslaðist á fætur og brosti til vegfarenda og sagði það væri allt i lagi með mig. Ég var hins vegar öll lurkum lamin og þegar ég kom heim tók ég verkjalyf. Ég ætlaði svo snemma í háttinn og lesa grískuglósur uppí rúmi, en þegar ég teygði mig eftir bókinni þrusaði ég kjammanum í skápahurðina og braut uppúr tönn. 

Svoleiðis að í dag er ég tognuð í úlnliðnum, bakið í skralli og aum í kjálkanum með skaddaða tönn.

Geri aðrir betur!

Trefoldighetskirkjan í Ósló

Vikan hófst ágætlega, en við Camilla áttum fínt kvöld saman á sunnudeginum og fórum í mjög góða Guðsþjónustu Trefoldighetskirken. Þetta er afar falleg gömul kirkja og virkilega notalegt að fara í messu þarna. Sniðið var fremur óhefðbundið og falleg og lifandi tónlist. Presturinn tók meðal annars viðtal við norskan stjórnmálamann, en dóttir hans tók líf sitt eftir að hafa farið í persónuleikapróf á vegum vísindakirkjunnar í Frakklandi í fyrra. Málið vakti mikla athygli fjölmiðla hér í Noregi og sterka andstöðu gegn vísindakirkjunni. Ég varð mjög snortin af þessari frásögn og hef þennan mann og fjölskyldu hans í bænum mínum. 

Á mánudeginum fór ég til Solasen með hóp úr PT (verklegri/praktískri Guðfræði) þar sem við áttum hljóðan bænadag saman í fallegum kofa með útsýni yfir Oslófjörðinn. Ég hefði eflaust notið dagsins betur ef ég hefði ekki fengið mígreniskast aldarinnar. Í lestinni á leiðinni heim varð ég náföl og hristist og skalf og hélt það myndi hreinlega líða yfir mig. Ingveld bekkjarsystir mín reyndist mér afar vel og fór með mér á læknavaktina. Þar sem ekki var útlit fyrir að ég kæmist að í bráð fórum við í apótek og ég tók tvöfaldan leyfilegan skammt af sterkustu verkjalyfjunum sem ég mátti kaupa án lyfseðils og þá fyrst fór sársaukinn að minnka. 

Ég drattaðist samt í skólan daginn eftir og í dag, og náði meira að segja að áorka heilmiklu í dag. Greiddi leigu og tryggingar, stússaðist í hinu og þessu og fór svo í klippingu, sem var vægast sagt þörf á. Inná milli hef ég þó verið iðin við að horfa á fyrstu seríu af Heroes sem ég keypti notaða á 100 kall :þ 

Á morgun tekur við tiltekt og lærdómur, en María systir kemur á föstudag!!! Við erum komnar með fína dagskrá fyrir helgina og stefnum meðal annars á að fara í Tusenfryd á laugardaginn!

Hafið það gott :)

Jámm, vil endilega hvetja alla til að skrifa komment á síðuna mína, það er afar einfalt. Eina sem þú þarft að gera er að skrifa inn nafn og netfang og ýta á "post comment" þá færðu upp glugga sem biður um lykilorðið fyrir netfangið þitt, þú velur hins vegar að klikka á "post as guest" neðarlega í vinstra horninu og þá birtist kommentið. 

Látið mig endilega vita ef þið lendið í vandræðum með þetta.